A solución galega Tecalis Signature, entre as mellores tecnoloxías de sinatura electrónica do mundo
venres, 5 de febreiro do 2021
A
empresa galega Tecalis, con
sede no Polígono de Milladoiro (Ames), vén de obter un novo e
importante recoñecemento á súa excelencia tecnolóxica. Trátase
da súa inclusión na lista Top Picks das mellores empresas de
solucións de sinatura electrónica a nivel internacional (Best
Electronic Signature Solutions), segundo o portal inglés sobre
seguridade cibernética Threat Technology, que achega unha
escolma de servizos onde se atopan organizacións de Estados Unidos,
Suecia, Dinamarca, Francia, Rusia, Australia. Alemaña, Reino Unido e
China entre outros países.
Tecalis
lembra que os parámetros medidos nas top seleccionadas
baséanse na demostración dun rendemento excepcional das
organizacións en polo menos una destas categorías: innovación
(ideas innovadoras, ruta innovadora cara ao mercado, produto
innovador), crecemento (crecemento excepcional, estratexia de
crecemento excepcional), así como a xestión e o impacto social.
Tecalis
Signature
Tecalis
Signature é unha solución para enviar e asinar todo tipo de
documentos xuridicamente vinculantes desde calquera dispositivo e con
total seguridade, axudando á axilización dos procesos empresariais
grazas a un deseño moi intuitivo e unha facilidade e sinxeleza de
uso. “A tecnoloxía de Tecalis”, explican fontes da empresa,
diferénciase doutras solucións de firma electrónica do mercado
porque incorpora “un innovador sistema de verificación da
identidade do usuario no propio fluxo da sinatura, é dicir, verifica
automaticamente a identidade dunha persoa á vez que esta asina un
documento”.
Amais,
ten a vantaxe de ser quen de verificar, en poucos segundos, a
identidade dos clientes usuarios asinantes, grazas á tecnoloxía KYC
(Know Your Customer, coñece ao teu cliente en inglés)
mediante o seu sistema de recoñecemento facial e de documentos de
identidade (DNI, pasaportes, etc.), asegurando así que unha persoa é
quen di ser en calquera acción dixital e, segundo engade Tecalis,
“cumprindo coas esixencias legais e as normativas e regulacións
vixentes”.
A
tecnoloxía é empregada por millóns de usuarios e por grandes
corporacións a nivel estatal, entre os que destacan os principais
operadores de telecomunicacións en España, que utilizan a
tecnoloxía Tecalis para a sinatura de contratos e de operacións de
pospago.