Bota a andar o Foro Tecnolóxico de Emprego na súa 22ª edición

Este 9 de marzo arrincou na UVigo a vixésima segunda edición do Foro Tecnolóxico de Emprego coa participación de preto de medio cento de empresas e asociacións, combinando os formatos presencial e virtual. Ata o venres 11 de marzo, as tres escolas de enxeñería dos Campus da UVigo acollerán os postos das empresas así como conferencias, demostracións e obradoiros que se desenvolverán nesta edición.
Preto dunha vintena de estudantes destas escolas serán os encargados da organización e coordinación das actividades, co obxectivo de facilitar o achegamento laboral dos futuros titulados e tituladas ao ámbito das empresas. No Foro Tecnolóxico repiten este ano presenza firmas como Cortizo, Repsol, Borgwarner ou PWC, ao tempo que se incorporan outras novas como a holandesa T Talent, Huawei, DataSpartan e AtlantTIC, o Centro de Investigación en Tecnoloxías de Telecomunicación da Universidade de Vigo.
No acto de inauguración do Foro, os e as participantes coincidiron na importancia de reivindicar o papel da tecnoloxía na sociedade actual, así como unha maior presenza das mulleres neste ámbito. Tanto a coordinadora xeral do Foro, Ivana Oganda, como o director da EE de Industrial, Juan Pardo, destacaron que o desenvolvemento tecnolóxico e científico axudou a enfrontar as dificultades vividas durante a pandemia, ao tempo que alertou da existencia dunha fenda tecnolóxica no ámbito laboral. A directora do EE de Minas e Enerxía, Elena Alonso, tamén se sumou a estas afirmacións e engadiu que o valor do Foro Tecnolóxico vai máis aló do seu lema, que fomenta a empregabilidade de maneira que se traballe para incorporar a máis mulleres a titulacións do ámbito das enxeñerías.
O Foro remata co acto de clausura o vindeiro venres ás 13:00 horas, no que participará o delegado do Estado na Zona Franca de Vigo, David Regades.