LG abre os seus televisiores ao xogo na nube de Xbox

Xbox e LG Electronics anuncian unha nova colaboración que permitirá acceder a centos de videoxogos directamente desde os televisores conectados de LG, sen necesidade de consola. A través da app de Xbox, os usuarios poderán gozar de títulos do catálogo de Xbox Game Pass Ultimate en streaming grazas á tecnoloxía Xbox Cloud Gaming (Beta).
A aplicación xa está dispoñible en máis de 25 países para televisores LG que conten con webOS 24 ou versións posteriores (incluíndo modelos OLED de 2022, algúns modelos de 2023 e todos os máis recentes), así como en monitores conectados compatibles. Ademais, LG confirmou que a aplicación chegará pronto ás súas pantallas StanbyME.
Desde o Gaming Portal ou directamente desde a tenda de aplicacións de LG, os usuarios poden descargar a aplicación e iniciar sesión coa súa conta de Xbox Game Pass Ultimate. Con tan só un mando compatible, terán acceso inmediato a centos de xogos de estudios como Activision, Bethesda, Blizzard, Mojang ou Xbox Game Studios. Títulos populares como Avowed, South of Midnight ou o esperado Towerborne estarán dispoñibles desde o primeiro día, así como éxitos masivos como Call of Duty: Black Ops 6.
Unha das grandes vantaxes é que os membros de Game Pass Ultimate tamén poden retransmitir determinados xogos que xa posúan (como NBA 2K25 ou Hogwarts Legacy), mesmo se non forman parte do catálogo de Game Pass, funcionalidade que xa está dispoñible para máis dun cento de títulos.
A aplicación integra algunhas das funcionalidades clave de Xbox Cloud Gaming, como a posibilidade de enviar ligazóns de convite para partidas na nube, cambiar de xogo sen interrupcións e empregar rato e teclado en títulos seleccionados. Ademais, continúa a expansión de Xbox Play Anywhere, que permite manter o progreso nos xogos entre diferentes dispositivos.
LG, pola súa parte, destaca esta colaboración como un paso máis no seu compromiso de ofrecer unha experiencia de entretemento doméstico completa. A través dos seus televisores OLED e QNED de última xeración, a compañía aposta pola máxima calidade visual, cunha interface intuitiva e adaptada para xogos na nube. A resolución 4K, a fluidez da imaxe e a compatibilidade co control por mando son algúns dos elementos que fan da súa plataforma unha opción cada vez máis atractiva para xogadores de todo o mundo.