Os premios GirlGeekCovid xa teñen gañadoras
venres, 12 de febreiro do 2021
A Universidade
de Vigo e a Deputación de Pontevedra celebraron
no marco da Cátedra Feminismos 4.0 os premios GirlGeekCovid,
coincidindo co Día Internacional da Muller e a Nena na Ciencia (este
xoves 11 de febreiro). A
entrega dos
galardóns desenvolveuse onte
a través de Internet, debido á situación sanitaria. As galardoadas
no ámbito da Ciencia e da Enxeñaría foron Ana
Ramírez (Bioloxía) e Iria Ollero (Enxeñaría Biomédica).
Ambas
recibiron 2.000 euros polas súas contribucións.
Doutra banda, Laura Sánchez (Máster de Nanociencia e
Nanotecnoloxía) e Marielena Márquez (Enxeñaría de
Telecomunicación) foron premiadas con 1.000 euros nas respectivas
categorías.
O
xurado valorou o expediente académico e a motivación das mozas que
presentaron unha carta onde amosaron as súas opinións e razóns
polas que optaron a realizar estudos universitarios no ámbito das
STEM. De feito, a primeira galardoada, Ana Ramírez, que posúe unha
nota media de 8,68, quixo reivindicar “o papel que xogan as
mulleres na sociedade e a importancia de facer visible todas as
contribucións e logros nos eidos da ciencia, da tecnoloxía e da
enxeñaría”. Da mesma forma, a outra muller premiada cun 8,9 de
media, Iria Ollero, sinalou que “queda moito camiño por percorrer
para que os avances dende a perspectiva de xénero que comezan a
aparecer no mundo académico, se afiancen tamén no ámbito
laboral”.
Segundo a
UVigo, “as
alumnas son maioría en todos os eidos do coñecemento, excepto no da
enxeñaría e a arquitectura, no que representan tan só o 23% do
total do alumnado
matriculado”. Isto pode xerar unha fenda económica e salarial no
futuro, xa que gran parte dos traballos van pertencer a estes
ámbitos. Por iso é fundamental fomentar as vocacións femininas
nestes campos.