Patricia Argerey (GAIN) cualifica de modélico o proxecto de transformación de CONGALSA e Gradiant
venres, 30 de xuño do 2023
A
sede na Pobra do Caramiñal da firma alimentaria CONGALSA,
un dos grandes referentes da transformación empresarial galega,
recibiu este venres 30 de xuño a visita da directora da Axencia
Galega de Innovación, Patricia Argerey, para coñecer os
resultados do proxecto innovador CONGALS4.0. En palabras de Argerey,
trátase “dunha iniciativa modélica en transformación
industrial”.
O
proxecto, apoiado polo programa Fábrica Intelixente e Sostíbel da
Xunta de Galicia con financiamento FEDER e desenvolvido en
colaboración co Centro Tecnolóxico Gradiant, permitiu a
implementación de tecnoloxías dixitais no proceso de fabricación
para avanzar cara a un modelo de fábrica máis flexíbel,
automatizada, social, colaborativa, conectada e intelixente.
Ademais,
contou cun orzamento de preto de 5 millóns de euros e unha axuda
pública de 2 millóns.
Argerey
destacou o seu impacto tanto “na mellora dos procesos produtivos,
na eficiencia na entrega a clientes, a redución de custos e a
capacidade de adaptación máis rápida ao mercado”. Subliñou
tamén “o efecto tractor deste proxecto sobre o ámbito alimentario
galego a través do seu impacto sobre a cadea de valor e a difusión
dos resultados ao resto do sector”. Ademais, sinalou “a
importancia da colaboración entre os centros tecnolóxicos e as
empresas para transformar o coñecemento que se xera nestes en valor
económico e social”.
A
directora da Axencia Galega de Innovación lembrou durante a visita a
próxima activación da quinta edición do programa Fábrica
Intelixente e Sostíbel, que ten como obxectivo “apoiar proxectos
empresariais de I+D+i de carácter estratéxico para o tecido
industrial galego centrados no desenvolvemento de tecnoloxías
dixitais e verdes”, e cuxa publicación no Diario Oficial de
Galicia (DOG) está prevista para o vindeiro xoves, 6 de xullo.
Argerey engadiu que nesa mesma data celebrarase unha xornada de
presentación da convocatoria na sede da Axencia Galega de Innovación
en Santiago de Compostela. O prazo de presentación de solicitudes
permanecerá aberto ata o 2 de outubro. A convocatoria, dotada con
24 millóns de euros e co-financiamento da Unión Europea no marco do
programa FEDERGalicia 2021-2027, está dirixida tanto a pemes como
grandes empresas e organismos de investigación en colaboración
cunha ou varias compañías co obxectivo de seguir avanzando cara un
novo modelo industrial baseado no coñecemento e na competitividade.