Política Lingüística, a USC e Casio presentan unha calculadora científica con configuración en galego
xoves, 30 de marzo do 2023
Este
xoves
30 de abril celebrouse na Facultade de Matemáticas da USC a
presentación do novo modelo da calculadora ClassWiz, de Casio,
que por primeira vez, e coincidindo co décimo aniversario do seu
lanzamento, inclúe a lingua galega entre as súas opcións de
configuración. Deste xeito, esta ferramenta científica xa pode
usarse en cinco linguas diferentes: galego, catalán, éuscaro,
castelán e portugués.
Na
presentación participaron, entre outros, a decana de Matemáticas,
Elena Vázquez Cendón, e o secretario xeral de Política
Lingüística, Valentín García, quen destacou “a importancia que
supón a incorporación da lingua galega ás tecnoloxías,
especialmente nun caso como este, que implica a oferta do galego á
comunidade científica e ao amplo abano de usuarios que poden usar
esta ferramenta no seu día a día”.
No
acto, que coincidiu coa clausura do Mes das Matemáticas, tamén
participaron o director xeral de Casio en España, François
Vilaprinyó; o presidente da Asociación Galega de Profesores de
Matemáticas (AGAPEMA), Julio R. Taboada; Cristina Naya, doutora en
Matemáticas pola Universidade de Santiago (USC); Ana Freire, doutora
e enxeñeira en Informática, e Eloy Bernal, responsable de
comunicación da División Educativa de Casio España.
Segundo
fixeron saber, este novo modelo, desenvolvido desde a División
Educativa Casio, está deseñado por e para docentes, atende ás
melloras solicitadas polos usuarios e ofrece unha calculadora
científica máis intuitiva e sustentábel, con novas funcións de
azar e emulador online, entre outras novidades.
Para
a súa correcta utilización entre o profesorado de materias como
Matemáticas ou Física ou Química, a Xunta e Casio prepararon, a
través do Centro Autonómico de Formación e Innovación, unha serie
de obradoiros de aprendizaxe que lles permita aos docentes manexar
con soltura esta ferramenta.
A
rolda de prensa tamén foi escenario para anunciar a incorporación
da imaxe da galega Ana Freire, líder do Proxecto STOP (Suicide
Prevention in Social Platforms), á colección de calculadoras
#científicasCASIO, da que forman parte grandes nomes da historia
como Ada Lovelace ou Marie Curie. Deste xeito, o novo modelo de
ClassWizz xa está dispoñible tamén coa ilustración da enxeñeira
lucense, obra da artista galega Lula Goce.
Esta
colección, realizada en colaboración con 13 ilustradoras que
decoraron as calculadoras ClassWiz coa imaxe de distintas
científicas, pretende ser unha homenaxe ao significativo traballo da
muller neste eido.