Unha actualización de software evitará os problemas de quecemento dos novos iPhone

Nas últimas semanas emerxeron numerosas críticas sobre os novos iPhone, sendo as máis frecuentes as relativas ao novo marco de titanio (e o feo que podería rematar ao longo do tempo, especialmente nos modelos de cores) e a elevada temperatura que acadaban os terminais, o que chegou a constatarse mediante probas de laboratorio.
Cómpre lembrar que o feito de que un iPhone novo experimente temperaturas elevadas non é ningunha sorpresa, pois é algo bastante habitual durante os primeiros días de uso, xa que os usuarios normalmente transfiren información dende outro terminal e logo o smartphone pasa días executando aplicacións en segundo plano para optimizar o dispositivo, o que pode percibirse tanto a nivel térmico como nun excesivo consumo de batería.
Nesta ocasión, ao haber cambios nos modelos Pro, como a adopción dun marco de titanio e o emprego dun procesador fabricado en 3 nanómetros, xurdiron rumores de que os problemas de quecemento dos novos móbiles podería ser consecuencia dun fallo de deseño, pero Apple xa saíu a desmentilo, e asegurou que a causa é un fallo en iOS 17, que xa están a traballar en solucionalo.
De feito, Apple non só admitía fallos en iOS 17, senón que tamén apuntaba o mencionado problema das actividades en segundo plano ao restaurar un dispositivo e aseguraba ter detectado problemas nalgunhas aplicacións de terceiros (como Uber e Instagram). En calquera caso parece confirmado que estamos ante un problema real, e non ante dun dos cada vez máis absurdos escándalos que seguen a cada lanzamento dun iPhone, e que nesta ocasión simplemente cómpre ter que agardar uns días a que se solucione a situación.

Adeus aos problemas en Francia

Algo semellante estaría a acontecer en Francia, onde obrigaron a Apple a deixar de vender o iPhone 12 (algo que xa non facía directamente, pois non venden por canles ordinarias os modelos tan vellos) por supostamente superar as emisións de radiación con respecto á normativa europea e, aínda que Apple non estaba conforme coas conclusións das autoridades francesas (argumentando erros metodolóxicos nas súas medicións) veñen de publicar unha actualización do sistema operativo que facilita que o iPhone 12 supere sen problema as probas ás que o someteron en Francia, dando as autoridades galas por boa a solución adoptada, de xeito que non obrigarán á retirada do dispositivo das mans dos seus usuarios.